2 liedjes
scroll naar beneden voor de teksten
- Óngerwaeg (Aope Deure 2018)
- Oppe toekoms
Óngerwaeg
PDF met tekst en akkoorden
Spotify
Probeers 't sjtiekem te verberge
Zorgs det angere 't neet merke
Lachs es ederein aan 't lache is
Sjriks es emes vreug: Waat is d'r mis
En al sjteis se mit heel väöl man bie-ein
Doe bös en bliefs en veuls dich toch allein
Veuls dich eigelik neet toes
En gings 't leefs weer truuk nao hoes
Óngerwaeg, dae wèts neet waat of wae se taenge kums
Óngerwaeg, ’t maak neet oet wie of van wo se kums
En dao is nieks van waat v’r höbbe zónger waerde
Ederein en alles haet zien eige waerde
Óngerwaeg, óngerwaeg
Vreugs dich weer ‘s aaf wie dök
Bliefse haope op gelök
Zuus in angere det wie se gaer zous zin
Eder kans die pak se es ’n nuuj begin
Zeuks ‘n sjtum die se vertroewe kèns
Sjtilte is get wo se nooit aan wèns
Kieks veuroet waat gewaes is is gewaes
Hèls dich vas aan de druime die se haes
Kries pien in diene nek van ’t nao baove kieke
wils soms op waasse zuus ‘s effe heel gaer lieke
den zo mer oet ’t nieks ‘ne sjouwer ‘ne handj
dae wies nao wie ’t veult es diene goje kantj
-
Jo Janssen (basgitaar)
Leo Crombach (gitaar en koor)
Luc Jakobs (toetsen en koor)
Ton Custers (zang, gitaar)
Tekst en muziek: Ton Custers
Arrangement: Aope Deure Band
CD: Aope Deure 2018
Mei 2018 Marlstone Music
-
Oppe toekoms
PDF met tekst en akkoorden
YouTube
Es ich zo mer effe ‘s zónjessjmiddes aan de wanjel gaon
en ich zeen den alle buim weer mit die kleine bleumkes sjtaon
Ich loup nag mit de lètste aom weer eine nuje heuvel op
den krieg ich es beloning waat ich dao den zeen vanaaf de top
Ich zit mich op ‘n benkske det dao emes haet gezat
dae haet dao bès waal eine goje kiek toen op gehad
Mit de ouge in ‘n sjpleetje kiek ich nao de lòch
En ich veul det ich gevónje höb det waat ich höb gezòch
Drink oppe toekoms, en drink op ‘t landj
wo se noe veur keus det haet mit morge ‘ne bandj
Doe kieks en den preuf se wo dit alles is gemaak
Dit is puur dit is natuur dit is genete en ‘t sjmaak
De póngel weer bie-ein geraap de bank adieu gezag
‘n blaor ónger de veut mer oppe móndj blief ‘ne lach
Ich sjlinger mich door paedjes en geneet van waat ich zeen
en vraog mich sjtiekem aaf wo det ich dit aan verdeen
Den örges óngerwaeg den ligk dao zo mer ‘n café
en ich dink, och jao det is nag neet zo’n sjlech idee
Ich gaon nao binne en ich zègk de kastelein den goeie daag
en ich vraog den of ich zó’n lekker pilske maag
-
Hay Hutjens (keyboard)
Jo Janssen (basgitaar)
Leo Crombach (gitaar)
Ton Custers (zang en gitaar)
Tekst en muziek: Ton Custers
Arrangement: Aope Deure Band
(2007)
-